കുടിയന്@അയ്യപ്പബൈജു.com
ആര്. പ്രശാന്ത്, ബ്ളോക്ക് നമ്പര് 40, ഹരിജന് കോളനി,അറവുകാട്, പുന്നപ്ര പി. ഒ,ആലപ്പുഴ ജില്ല. പിന്: 688 004. ഈ മേല്വിലാസം കണ്ടാല് ഒരു പക്ഷെ മലയാളികള് തിരിച്ചറിഞ്ഞെന്നുവരില്ല. ആളെക്കുറിച്ചുള്ള സൂചന നല്കിയാല് തിരിച്ചറിയാത്തവരായി ഒരുപക്ഷെ മലയാളികളാരുമുണ്ടാവില്ല.
"വഴിയരികില് പതിതനായി ചിരിച്ചുനില്ക്കും ബൈജു. അടികിട്ടിയാല് ഓടക്കുള്ളില് കിടന്നുറങ്ങും ബൈജു"- മദ്യപാനികള്ക്ക് സമൂഹത്തില് 'നല്ല' വിലാസമുണ്ടാക്കിക്കൊടുത്ത കേരളത്തിണ്റ്റെ സ്വന്തം കുടിയന് 'അയ്യപ്പ ബൈജു'വിണ്റ്റെ തപാല് വിലാസമാണിത്. നാട്ടിന്പുറത്തെ മദ്യപാനിയുടെ ചേഷ്ടകളും ഭാവങ്ങളും വിദേശങ്ങളിലുള്പ്പെടെ ആയിരക്കണക്കിന് വേദികളില് അവതരിപ്പിച്ച് മലയാളത്തിണ്റ്റ ചിരിക്കുടുക്കയായി മാറിയ പുന്നപ്ര പ്രശാന്തിന് സ്വന്തം പേരിലുള്ള കത്തുകളൊന്നും ഇപ്പോള് ലഭിക്കാറില്ല. എല്ലാം അയ്യപ്പ ബൈജു എന്നപേരിലാണ്.
അയ്യപ്പ ബൈജു, ആലപ്പുഴ എന്ന് മാത്രം കവറിണ്റ്റെ പുറത്തെഴുതിയ നൂറ് കണക്കിന് കത്തുകള് മേല്വിലാസം തെറ്റാതെ പ്രശാന്തിണ്റ്റെ വീട്ടിലെത്തിയിട്ടുണ്ട്. അടുത്തിടെ പുന്നപ്രയിലെ വീട്ടില് നിന്ന് നഗരത്തിനടുത്തുള്ള പഴവീട് എന്ന സ്ഥലത്തേക്ക് താമസം മാറ്റിയെങ്കിലും പ്രശാന്തിനുള്ള കത്തുകള് വഴിതെറ്റാറില്ല. കൃത്യമായ മേല്വിലാസം അറിയാത്തതുകൊണ്ട് കത്തെഴുതാന് കഴിയാത്ത ആയിരക്കണക്കിന് ആരാധകര് വേറെയുമുണ്ട്. ഇവര്ക്ക് വേണ്ടി പ്രശാന്ത് സ്വന്തം മേല്വിലാസം അല്പം പരിഷ്കരിച്ചതോടെ സൈബര് ലോകത്തും കുടിയണ്റ്റെ കുസൃതികള് തുടങ്ങിക്കഴിഞ്ഞു. തമാശകളെത്ര കേട്ടാലും ചിരി വെറുമൊരു പുഞ്ചിരിയിലൊതുക്കുന്ന മലയാളിക്ക് ഇനി എപ്പോഴെങ്കിലും പൊട്ടിച്ചിരിക്കണമെങ്കില് ഒരു മൌസ് ക്ളിക്കിണ്റ്റെ ദൂരത്തില് ബൈജുവുണ്ട്. www.ayyappabaiju.com എന്ന വെബ് സൈറ്റില്. പ്രശാന്ത് എന്ന പേര് ബൈജുവായും പിന്നീട് അയ്യപ്പബൈജുവായും വഴിമാറിയത് കൊണ്ട് അതേ വിലാസം തന്നെയാണ് വെബ് സൈറ്റിനും.
സൈറ്റ് തുറക്കുന്നവര് ആദ്യം കാണുന്നത് 'ഫുള് പാമ്പായി' നില്ക്കുന്ന ബൈജുവിനെയാണ്. താഴെയുളള മെനുവില് ക്ളിക്ക് ചെയ്യുന്നതോടെ അയ്യപ്പബൈജുവിണ്റ്റെ ലോകത്തെത്താം. രണ്ടാമത്തെ പേജില് പ്രശാന്തിനെക്കുറിച്ചും സ്വന്തം ട്രൂപ്പായ കോമഡി മേറ്റ്സിലെ കലാകാരന്മാരെക്കുറിച്ചുളള ലഘുവിവരണമുണ്ട്. വിശദവിവരങ്ങള് അറിയണമെങ്കില് അതാത് മെനുവില് ക്ളിക്ക് ചെയ്താല് മതി. പ്രശാന്ത് ഇതുവരെ വേദിയില് അവതരിപ്പിച്ച തമാശകളുടെ വീഡിയോ ക്ളിപ്പിംഗുകള്, അഭിനയിച്ച സിനിമകളിലെ ദൃശ്യങ്ങള് തുടങ്ങിയവ ആരാധകര്ക്ക് ഡൌണ്ലോഡ് ചെയ്തെടുക്കാനുള്ള സൌകര്യവുമുണ്ട്. പ്രശാന്തിണ്റ്റെ ആരാധകരെ പൂര്ണമായും തൃപ്തിപ്പെടുത്തുന്ന തരത്തിലാണ് സൈറ്റ് രൂപകല്പ്പന ചെയ്തിരിക്കുന്നതെന്ന് വെബ് ഡിസൈനര് ആലപ്പുഴ സനാതനപുരം മിഥിലയില് എം. ജയകൃഷ്ണന് പറയുന്നു. കഴിഞ്ഞമാസമാണ്് സൈറ്റിണ്റ്റെ രൂപകല്പ്പന തുടങ്ങിയത്. ഔദ്യോഗികമായി സംഭവം പുറത്തുവിട്ടിട്ടില്ലെങ്കിലും പറഞ്ഞുകേട്ടവരായി ആയിരത്തോളം പേര് സൈറ്റ് സന്ദര്ശിച്ചുകഴിഞ്ഞു.
നല്ലൊരു ഗായകന് കൂടിയായ പ്രശാന്ത് ബൈജുവിണ്റ്റെ ഓണം, കള്ളാണ് ഭാസ്കര എന്നിങ്ങനെ രണ്ട് ഓഡിയോ കാസറ്റുകളും പുറത്തിറക്കിയിട്ടുണ്ട്. ഈ ഗാനങ്ങളും വൈബ് സൈറ്റില് അപ്ളോഡ് ചെയ്യും.ജയരാജിണ്റ്റെ റെയ്ന് റെയ്ന് കം എഗൈന്, തമ്പി കണ്ണന്താനത്തിണ്റ്റെ ഫ്രീഡം, സിബിമലയിലിണ്റ്റെ ആലീസ് ഇന് വണ്ടര്ലാണ്റ്റ്, അടൂറ് ഗോപാലകൃഷ്ണണ്റ്റെ നാലു പെണ്ണുങ്ങള് എന്നീ മലയാള ചിത്രങ്ങള്ക്ക് ശേഷം കാതല് വര്ണ്ണങ്ങള് എന്ന തമിഴ് സിനിമയുടെ ഷൂട്ടിംഗ് തിരക്കിലാണിപ്പോള് ബൈജു. ഇതില് കോര്ട്ടര് ഗോവിന്ദന് എന്ന മുഴുനീള കോമഡി കഥാപാത്രമായാണ് പ്രശാന്ത് വെള്ളിത്തിരയിലെത്തുന്നത്.
No comments:
Post a Comment